周四（24日）英冠赛事，富咸凭阿历山大米祖域梅开二度，2比1击败彼德堡。除咗富咸继续高踞榜首之外，米祖域今场仲刷新咗呢项赛事，自2004年创立以来嘅最高入球数字纪录。

赛前已经排喺榜首嘅富咸，领先第2位嘅般尼茅夫6分，正向住取得来季英超资格迈进。27岁塞尔维亚射手阿历山大米祖域，今场继续领衔锋线，先喺28分钟凭一记12码入球，打破宾福特前锋艾云东尼上季创下嘅31球纪录；其後喺62分钟窝利射入个人今季第33个联赛入球，将最高入球数字进一步推高。富咸赢波後，目前已抛离第2位达9分，但打多两场，不过米祖域脚风咁顺，富咸提早升超或者只系时间嘅问题。