曼联周六(26日)主场被屈福特闷和0比0，联赛榜虽然继续排喺第4位，但只系领先阿仙奴2分兼踢多3场，形势其实处於下风。今次屡失良机嘅C朗拿度，全场表现劲忟憎。曼联嚟紧更会展开地狱赛程，如果C朗唔及时振作，「红魔鬼」都几难捱！

曼联今场围攻屈福特，22次攻门都入唔到波，C朗更加愈踢愈忟憎，不断有「发脾气表情包」提供。曼联领队兰历克赛後表示：「做领队嘅工作就系帮球队制造最多机会，我哋今场制造嘅机会足够赢波，但把握力一定要更加锐利，错失咁多机会点可以赢？」

自踏入2022年後，C朗10场比赛全部正选上阵，但只系喺对白礼顿一仗入过1球，佢对上一次喺新年头10仗只入1球，已经系2004年嘅事，依家正经历18年来最差嘅「开年」走势。更令球迷担心嘅系，曼联嚟紧进入地狱赛程，未来4仗系对曼城、热刺、马德里体育会同利物浦，场场都系超级硬仗！