曼联球星C朗状态低迷，近10场比赛仅入1球，英国《曼彻斯特晚报》爆料，指红魔鬼看守领队兰历克已经对C朗失去耐性，唔排除建议会方提早於今夏同呢位37岁葡萄牙射手解约。

C朗上年8月同曼联签约至2023年6月，年薪高达2,652万镑，原本表现唔错，但兰历克上年11月尾取代苏斯克查，接手执教曼联後，采取压迫性踢法，呢位老将表现格格不入，踏入2022年後，状态更直插谷底，上场英超对屈福特，多次浪费入波机会，事後传出曼联下场英超大战曼城，兰历克好可能将C朗贬为後备。

兰历克将C朗打入冷宫只系第一步，呢位德国名帅下季将会转任曼联顾问，全权统筹球队嘅转会、组军工作同发展方向，佢最希望改组锋线，以目前情况睇，佢好大机会建议会方今夏提早同C朗解约，以及放走另1位老将卡云尼，并签入年轻射手，提升攻力。

C朗曾经扬言要协助曼联重夺英超冠军，恐怕佢嘅美梦难以实现。