喺看守领队兰历克带领下，曼联嘅表现未见起色。「红魔鬼」足球总监梅托周二(1日)宣布，球会已展开甄选新帅嘅程序，意味兰历克已经被排除在外，人选之中除咗有大热普捷天奴外，仲有阿积士教头坦哈格。

前任领队苏斯克查去年11月离任後，曼联聘请德国「教父」兰历克做顾问，兼暂掌帅印。虽然头几仗令人惊喜，但蜜月期过後曼联表现回落，喺联赛接连失分，兼喺英足盃出局。据英国传媒报道，「红魔」将会喺今夏正式换帅，而63岁嘅兰历克已被排除喺人选之外，将回到顾问嘅角色。

曼联足球总监梅托表示：「曼联正式展开正式领队甄选嘅程序，新帅今个夏天将会上任，目标会系带领我哋重夺本土同欧洲锦标。」消息又指，热门人选除咗有一直盛传会转投「红魔」嘅前热刺领队普捷天奴外， 仲有阿积士教头坦哈格，後者仲得到兰历克嘅提名。呢位52岁荷兰教练，2017年接掌阿积士，曾带领球队2018/19年打入欧联4强，仲赢得两季荷甲冠军，执教实力唔可以忽视，绝对有力同普捷天奴争吓。