现年38岁嘅阿根廷前锋泰维斯，今年7月离开小保加後一直未有落班，不过呢位前曼联球星从来未宣布退休，日前更现身AC米兰嘅训练场，同总监马甸尼、教练皮奥利等见面，令泰维斯将会加盟AC米兰嘅传闻出现。

据《米兰体育报》消息，泰维斯继早前入场睇国际米兰对祖云达斯嘅大战後，周五(8日)再现身AC米兰练习场，同马甸尼、皮奥利等多位话事人见面，曾效力祖云达斯2年嘅佢似乎有意返意甲发展。泰维斯虽然已经38岁，不过仍未准备挂靴，早前就有传佢会去美职搵食。

AC米兰出名锺意老人前锋，目前阵中已经有40岁嘅伊巴谦莫域同35岁嘅基奥特，如果签埋38岁嘅泰维斯，呢位老人锋线都几有睇头！