今晚意甲尾场焦点战，拉素主场硬撼费伦天拿。拉素喺主帅沙利麾下崇尚进攻，初段例必抢缰，但明显有前冇後，撞正火力全开嘅「紫百合」，预计一开波即驳火，1.5球半场大捧得过。（Now 638周二凌晨3时45分直播）

拉素「烟铲教头」沙利一向主打进攻，今季联赛踢咗9仗，入12球但失12球，真系有前冇後。虽然王牌恩莫比尼无复当年勇，但攻击点分得更散，尤其系中场路尔斯阿拔图、马泰斯云仙奴後上入楔力强，而且沙利总系想先发制人，经常一开波即抢攻，希望尽快取得领先，不过球队防守不稳，导致初段尚有失波，佢哋各项赛事近4仗取得3胜1负，全部半场开2球或以上，明显系攻咗先讲。

另边厢，费伦天拿同样嗜攻，单计联赛踢9仗攻入18粒，但失咗13球，都系重攻轻守，除咗中场邦拿云度拉频有士哥，阿根廷国脚尼高拉斯干沙利斯今季联赛已有5球进帐，上周中欧协联更将佢收起，摆明留力打今仗。「紫百合」各项赛事近9仗获5胜3和1负，共轰22粒，包括以3比1击败上季意甲盟主拿玻里，以及上周中欧协联狂数古卡历斯基6比0，其中7仗上半场已有波入，入局坚快，今仗癫凤斗狂龙格局，相信上半场已经驳火，半场大有计。

文章关键字：意甲主帅欧协联