迪基亚今夏约满离开曼联後，一直未有班落，根据英国《太阳报》爆料，沙特阿拉伯豪门艾纳斯曾经向呢位33岁西班牙钢门开出50万镑(约485万港元)周薪合约，利诱佢加盟同前曼联队友C朗合作。不过，迪基亚断然拒绝，因为佢老婆Edurne唔想去中东生活，迪基亚倾向加盟美职球队国际迈亚密，同美斯做队友。

迪基亚之前效力曼联，拥有37.5万镑周薪，会方要求佢减一半人工，最终续约失败，艾纳斯开出50万镑周薪，照计可以满足迪基亚要求，但佢都要顾及家人感受，由於太太唔想移居沙特，作为廿四孝老公当然要听老婆说话。

事实上，有多间球会有兴趣签入迪基亚，包括国际迈亚密，佢亦想有意加盟，皆因呢支美职豪门除咗有球王美斯助阵之外，亦有2位西班牙名将布斯基斯、但佐迪艾巴，大家同声同气，加上美国文化同欧洲接近，亦有助迪基亚同家人适应新环境。下季美职将於明年2月24日开锣，迪基亚一直未加盟新球会，可能就系等紧国际迈亚密出手。