世盃决赛周迫在眉睫，列强热身赛陆续开动。波斯尼亚出发去美国备战世盃前，今晚喺主场约战北马其顿「拍跳」。波斯尼亚今届点兵重用旧将，合作性高，今场志在磨练状态，相信会避重就轻，对住实力接近嘅北马其顿，一定唔会去尽，好大机会以「和」为贵。

（周六凌晨2时30分开赛）

今届第2次出战世盃决赛周嘅波斯尼亚，点兵都系熟口熟面，40岁嘅射手迪斯高仍然系台柱，佢同後衞哥拉辛拿斯都有份踢2014年世盃，亦反映球队出现青黄不接问题。

除咗最近入籍即获徵召嘅进攻中场马希米，队中大部分球员都合作过一段时间，领队巴巴斯都领军超过3年，踢法已经成形，唔需要再试阵。

波斯尼亚着重整体战，踢法偏向稳阵波，迪斯高季尾膊头受伤抖咗成个月，复出之後都未踢过正选；效力慕逊加柏嘅前锋达巴高域亦系带伤入选，今场多数唔会上阵，削弱争胜能力。波斯尼亚稳打稳紮，喺世盃附加赛2场分别同威尔斯、意大利打和，靠互射12码出线，最近3场赛事全开和局，防线顶得两嘴。

另边厢，北马其顿虽然入唔到今届世盃，但佢哋只系喺附加赛出局，整体实力同波斯尼亚相差唔远，两队过去3次交锋，有2次打成平手。北马其顿踢法同样系守优於攻，佢哋近6场赛事有4次打和，当中3场同对手闷和0比0，强如比利时都畀佢哋守和，今场不妨直取和局。