英超车路士班主阿布拉莫域透过球会官网，正式宣布已经决定出售呢间伦敦球会，呢位俄罗斯富豪愿意放弃借畀车仔嘅15亿镑(约157亿港元)贷款，并会捐出出售球会嘅净收益，成立慈善基金，帮助因为俄罗斯入侵乌克兰而造成嘅战争受害者。

阿布发表声明话：「近期传媒有唔少关於我对於车路士拥有权嘅猜测，正如我之前所讲，我一直以球会利益为先，目前情况之下，我决定将球会卖盘，我相信咁做对於球会、球迷、职员、赞助商及合作夥伴都系最有利。由於卖盘需要经过一系列程序，未必可以短期内完成，我唔会收回借畀车路士嘅贷款，咁做并非因为商业或者金钱原因，而系纯粹对於足球嘅热爱，此外，我已要求团队成立慈善基金，将出售球会嘅净收益拨入基金，帮助乌克兰战争嘅受害者，为佢哋提供即时及紧急嘅需要，以至将来长期重建工作。离开车路士系一个痛苦决定，我好荣幸可以成为球会其中一员，希望可以有最後1次机会返到史丹福桥球场，同球迷道别，谢谢。」由於英俄关系恶劣，恐怕阿布无法入境英国，同球迷讲再见。

据悉，阿布拉莫域已经委托美国金融机构，负责今次卖盘工作，佢认为车路士最少值30亿镑(约314亿港元)，瑞士富商韦斯日前已表明有意接手，亦盛传多个美国财团想收购车路士。

阿布2003年以1.4亿镑收购当时负债累累嘅车路士，借咗15亿镑畀球会，佢入主车仔19年，球队捧过5次英超冠军，仲有5次英格兰足总盃、3次英格兰联赛盃、2次欧联冠军、2次欧霸冠军及1次世界冠军球会盃。

由於俄罗斯入侵乌克兰，身为俄国总统普京「亲信」嘅阿布拉莫域，面临被英国制裁，佢早前已经宣布交出球会管理权畀慈善基金，但遇到阻滞，惟有直接出售车路士，以免球会受制裁问题拖累。

文章关键字：罗斯英超