C朗喺曼市打吡前「失踪」，看守领队兰历克同传媒讲「医疗部话佢受伤，我哋要信医生」，傻嘅都知佢讲反话，C朗同主帅关系僵化，离队传言四起，英国传媒列出C朗5大潜在目的地，估计C朗一旦离开曼联，下一站不出呢5队。

士砵亭

士砵亭系C朗成长出道嘅球会，由青训梯队踢到上一队，跟住就畀费格逊睇中收购过档曼联，佢阿妈成日讲，希望喺佢有生之年睇到阿仔返士砵亭踢波嘅一日，C朗咁孝顺，一定唔会逆阿妈意，因此士砵亭亦成为C朗下一站大热，问题系佢几时返去。

巴黎圣日耳门

巴黎圣日耳门签入美斯之後，一直无忘记C朗，旧年夏天C朗即将离开祖云达斯嗰阵，PSG曾表态希望签埋C朗，等佢同美斯组成球王组合，而且PSG喺法甲玩晒，保证年年有奖盃落袋，亦肯定踢到欧联，最重要嘅系，畀得起人工。

皇家马德里

C朗今季重返曼联，上演「爱回家」剧情，如果佢离开曼联再返皇马，呢出「爱回家2.0」相信有一定票房，而且传闻皇马今年夏天将会免费签入基利安麦巴比，忍者龟一直系C朗忠实粉丝，如果C朗返皇马，麦巴比同佢偶像同队作战，相信会几有趣。

拜仁慕尼黑

拜仁同罗拔利云度夫斯基仲未倾续约，传闻阿仙奴有意签入「罗拔佬」，C朗将会系合适嘅前锋替代人选，同PSG一样，拜仁喺德甲玩晒，可以保证C朗年年捧盃，同埋肯定有得踢欧联，唯一唔同嘅系，可能人工冇PSG咁高。

国际迈亚密

美职系好多顶级球星退休前最後一站，由碧咸做班主嘅国际迈亚密，一早就同C朗打过招呼，叫佢临收山嗰几年过美职踢佢队波，再者，美国市场亦对C朗场外事业发展大有好处，加上咸爷人脉，两代曼联巨星拍住上实冇衰。