英超嘅欧洲赛资格争夺非常紧凑，阿仙奴、曼联、热刺同韦斯咸都对前4位置虎视眈眈，目前排第4位嘅「兵工厂」形势最好，佢哋领先第5嘅曼联1分兼踢少3场，就咁睇系巨大优势，不过原来阿仙奴踢少嘅3场都系超级硬仗，有机会1分都拎唔到，赛程优势只系假象。

阿仙奴踢少嘅3场联赛，首仗就系下周四(17日)凌晨主场对利物浦，「红军」依家争冠气势如虹，想佢哋失分难度极高；另外2场补赛虽然未有日期，但一场系作客车路士、另一场系作客死敌热刺，呢2场「伦敦打吡」都唔能够保证会有分落袋。

虽然仲有唔少硬仗，不过阿仙奴就出重赏争夺前4，英国《每日邮报》报道，如果阿仙奴能够拎到欧联资格，球员将会获发巨额奖金，根据每个球员嘅贡献计算，最多可以独得50万镑，而且部份球员嘅合约中有特别条款，如果球队出战欧联会自动加薪，或者重赏之下可以拎到好成绩。

文章关键字：热刺利物浦曼联英超