拜仁慕尼黑喺欧联16强次回合大胜萨尔斯堡7比1，成为欧联16强史上第6场攻入7球嘅大胜，呢6场「7球大屠杀」赛事，拜仁占咗其中4场，可以话系欧联「大炒之王」。

拜仁以往经常喺欧联大胜对手，最经典系2020年8月嘅8强赛事赢巴塞隆拿8比2，如果单计16强，拜仁有4次1场攻入7球，包括2012及2015年分别同样以7比0大胜巴素利、萨克达，2009年及今场分别赢士砵亭、萨尔斯堡7比1

至於另外2场入7球大胜嘅欧联16强系2012年巴塞隆拿赢利华古逊7比1，同埋2019年曼城以7比0击败史浩克04。

此外，拜仁前锋罗拔利云度夫斯基今场入3球之後，喺欧联累积5次「戴帽」，仅次於有8次帽子戏法嘅C朗同美斯，罗拔佬今季各项赛事已经入42球，连续7季入波「40+」，呢位33岁波兰国脚今届欧联有12球进帐，超越阿积士前锋施巴斯坦贺拿，升上射手榜榜首。

中场汤马士梅拿表现亦好抢眼，呢位32岁德国国脚今场射入2球之後，喺欧联已经累积入52球，超越阿仙奴传奇神锋亨利，排欧联历史射手榜第7位。

文章关键字：拜仁曼城