巴黎圣日耳门(PSG)喺欧联16强出局，教练普捷天奴帅位岌岌可危！总监李察纳度赛後表明唔会「即刻」炒佢鱿鱼，但强烈暗示呢位阿根廷教头下季唔会留队。英国、法国传媒更指普捷天奴被炒已成定局，而佢已决心重返英超执教曼联。

喺法甲几乎横行嘅PSG，一直以欧联冠军为最大目标，今届再一次喺16强提早毕业，教练普捷天奴嘅成绩表肯定Fail，PSG总监李安纳度赛後被问到换帅问题，呢位巴西名宿回应：「我哋要团结，普捷天奴仍然系球队今季计划之内，唔可能每场输波之後都将所有嘢推倒。」李安纳度所指嘅「今季计划」，被视为夏季换帅嘅最大暗示。

法国《巴黎人报》进一步指出，除普捷天奴将会被炒之外，就连李安纳度亦会为今次出局付出「代价」，消息指主席艾卡理化赛後非常愤怒，大换血将会由领导层开始。普捷天奴赛後被问到自己同基利安麦巴比前途，佢亦拒绝回应：「今日非常失望，依家唔系讲呢啲问题嘅合适时间，我可以控制嘅只有面前嘅事。」

英国传媒指普捷天奴被炒已成定局，《每日电讯报》指「肥普」落镬炒後，将会接受曼联嘅聘约，法国足球记者Julien Laurens亦向《BBC》爆料：「普捷天奴下季一定唔会教PSG，除非PSG请施丹执教有变，事实上普捷天奴都唔想留队，佢喺巴黎已经住咗1年酒店，而佢所有屋企人都仲喺伦敦生活。」