周六（12日）深夜英超前列大战，曼联主场靠C朗拿度个人连中三元，以3比2险胜热刺，取得宝贵3分。赛後热刺领队干地，不忘大赞呢名葡萄牙球星，仲话佢嘅影响力，足以媲美以前嘅比利、马纳当拿。

热刺输咗波之後，暂时畀曼联拉开5分差距，争入前4位形势岌岌可危，不过领队干地赛後冇话特别嬲，反而仲大赞对手个人连中三元嘅C朗：「唔好忘记，以前比利、马纳当拿系世界上最好嘅两名球员，而呢个时代就系C朗同美斯，当你同呢类型球王比赛，佢哋嘅表现都系决定性。」

曼联虽然能够全取3分，但其实整场唔系占太大优势，更曾经畀热刺两度追成平手，干地坦言C朗正正系两队嘅最大分别：「老实讲，我认为如果冇C朗，对曼联嚟讲唔系一个美好夜晚。佢哋唔好话赢，连打和都困难。」