曼联喺英超争前4位大战击败热刺，赛前疑似确诊新冠肺炎嘅门将迪基亚继续披甲，但唔见主将般奴费南迪斯，原来呢位中场因为生病缺阵，幸好无阻红魔鬼全取3分，反而C朗踢出回巢之後代表作，再次掀起呢两位葡萄牙球星不能共存嘅争议。

C朗同般奴费南迪斯一山不能藏二虎嘅观点，最早出现喺国际赛，因为般费踢葡萄牙国家队嘅表现，远不及踢球会，最明显例子系佢上季大勇，但出战上年欧国盃决赛周4次上阵，冇入波又冇助攻，最後2场更失去正选，反观C朗成为神射手。

虽然话可能系葡萄牙国家队战术唔啱般奴费南迪斯发挥，但睇番C朗今季加盟曼联後，般费水准亦唔及上季，舆论认为C朗取代佢核心地位，令佢无所适从，表现患得患失，即使联赛入9球，但有3球系开锣战对列斯联时射入。般费上年9月对阿士东维拉，补时射失12码，被指因为C朗在身边，压力太大搞到宴客。

般费今场缺阵之下，保罗普巴代替佢踢进攻中场，同C朗配合唔错，看守领队兰历克透露，般费可以复出踢周三(16日)凌晨欧联16强次回合主场对马体会，大家可以再详细睇下葡萄牙孖宝不能共存嘅争议是否成立。