周日(13日)凌晨英超大战，曼联主场以3比2险胜热刺，红魔鬼巨星C朗大踢身价波，上演帽子戏法，包办3个入波，呢位37岁葡萄牙球王职业生涯累积入807球，超越已故捷克名宿比简，成为国际足协所承认，史上最多入波嘅球员。

C朗缺阵上场对曼城，搞到传闻四起，一方面指佢受伤，另一方面又话佢知道未能踢正选，愤而飞返葡萄牙。无论如何，C朗今场以行动证明自己既冇伤，又值得踢正选，佢喺开赛12分钟，就使出招牌重炮，远射破网，为曼联打开纪录。

其後热刺倾力反击，宾戴维斯曾经射入网，但因为越位食诈胡，踢到35分钟，热刺中场古路施夫斯基右路传中，曼联左闸阿历士迪尼斯喺禁区内犯手球，被吹罚12码，哈利卡尼主射入网，为热刺扳平1比1。

不过，仅过3分钟，曼联再次领先，查顿辛祖左路传中，C朗近门射入成2比1，跟住仲有拉舒福特劲射高出。

换边之後，曼联队长哈利马古尼又出事摆乌龙，将对手利古朗嘅传中波撞入自己龙门，帮咗热刺扳平2比2。踢到81分钟，C朗以救世主姿态出现，顶入角球，协助曼联以3比2绝杀热刺。

值得一提，曼联上年10月以3比0大胜热刺之後，导致对方主帅纽奴被炒，换来干地执教，两军今次再交锋，结果冇分别。

主角C朗早前一度状态低迷，曾经10场比赛只入1球，但今仗独取3球，重现颠峰水平。虽然C朗喺职业生涯59次帽子戏法，但今场只系佢第2次喺英超「戴帽」，对上1次已经系2008年1月对纽卡素，成为英超史上相隔最耐「戴帽」嘅球员。

C朗最犀利系一口气超越比简保持咗67年嘅纪录，成为正式赛事史上最多入波嘅球员，可称为球坛千古一帝。

球坛历史射手榜

C朗 807球

比简 805球

罗马里奥 772球

美斯 759球

比利 757球

注：国际足协承认数据