曼联前领队苏斯克查上年11月被炒鱿後，一直留喺英国生活，因为佢囡囡Karna仍然为曼联女子队效力。日前一场女子青年盃赛决赛，苏斯克查就入场见证爱女协助曼联赢得冠军，完场後仲同捧住冠军嘅Karna一齐合照，画面令球迷感触。

苏斯克查执教曼联差唔多3年，都未试过拎到冠军，估唔到被炒鱿後由囡囡代为完成心愿。周四(10日)举行嘅WSL Academy Cup决赛，曼联U21以4比1大胜伯明翰捧盃，Karna踢咗一个钟头左右，曼联头2个入波佢都有份参与兼有1次助攻，完场後苏斯克查亦喺场边同囡囡影捧盃照。

曼联U21领队史坚拿表示，Karna潜力非常优厚，而且有佢爸爸嘅影子：「老实讲，如果你睇Karna今季入波，佢嘅把握力系非常非常犀利，虽然Karna踢波风格同佢爸爸有啲唔同，但我肯定苏斯克查有将一啲秘诀传授畀佢，Karna嘅把握力系非常突出。」

文章关键字：曼联