曼联上场赢热刺3比2冇出般奴费南迪斯，当时有传佢病咗，後来官方证实确诊新冠肺炎，要休息养病，嚟紧欧联生死战对马体会上阵成疑，至於确诊超过一星期嘅劳基梳尔，同样要等赛前最後检测。

红魔鬼近期经历魔鬼赛程，但球员就轮流中招，早前华拉尼同劳基梳尔双双确诊，缺阵曼市打吡，华拉尼极速康复於热刺一仗复出，但梳尔仲未得，期间门将迪基亚亦怀疑中招，幸好最後无事可如常把关，但原来中招嘅系般奴费南迪斯。

虽然病咗，但般奴睇嚟精神唔错，击败热刺後佢喺社交网留言：「伟大的胜利，祝贺队友，尤其是基斯坦奴，又创造另一纪录。」

由於中新冠肺炎嘅病况因人而异，看守领队兰历克表示，中招球员或者可以返嚟练波，至於能否上阵就会喺开波前先决定。

文章关键字：热刺曼联