英超争冠形势再现变化，2个月前一度领先利物浦14分嘅曼城，周二(15日)凌晨作客水晶宫连环败家，惨被闷和0比0，依家只领先「红军」4分兼踢多1场。如果利物浦周四(17日)凌晨赢埋阿仙奴，就会追到只差1分，由於两队下月仲会正面交锋，意味利物浦已重夺争标嘅主动权。

曼城首循环曾主场0比2输畀水晶宫，今仗作客亦系疯狂围「宫」，可惜一众球员脚头无灵。奇云迪布尼上半场远射被扑出，贝拿度施华小禁区执到後唔即刻补射，反而推咗个波出底线；祖奥简些路27分钟劲射中柱，个波落喺龙门口嘅拿朴迪脚下，可惜佢嘅「後衞脚」面对空门一射冲天。下半场奇云迪布尼又有射门中柱、贝拿度施华铲射空门又斜出，注定曼城今场冇波入，最终0比0握手言和。

曼城上周中欧联主场0比0和士砵亭，今场又0比0打和水晶宫，系哥迪奥拿执教曼城以来首次连续2场0比0。「蓝月亮」今场有74%控球率兼18次攻门，哥迪奥拿赛後就话满意球队表现：「落场嘅球员都踢得好好，呢个系我选择唔换人嘅原因，唯一错误就系入唔到波，但以表现嚟讲我系好满意。」

虽然哥帅口讲「收货」，但绩分榜上就面对极大压力，曼城喺1月中曾领先踢少2场嘅利物浦14分，但随住打和修咸顿、水晶宫同埋输畀热刺，依家只系领先利物浦4分兼踢多1场，领先优势几乎全部蒸发。4月10日利物浦将会作客曼城上演冠军前哨战，「红军」只要赢晒余下比赛就可夺冠，唔需要再等曼城失分。

文章关键字：热刺利物浦曼城英超