周五(18日)凌晨欧霸盃16强次回合大战，巴塞隆拿作客以2比1反胜加拉塔沙雷，两回合合计以相同比数晋级8强。巴塞隆拿今场主角系19岁新人王柏迪，佢喺中场控制晒战局，扳平嘅关键入波更充满美斯影子，玩到2名敌卫一仆一碌先射入，表现光芒四射。

首回合两队踢成0比0，巴塞今仗作客土耳其危机四伏，果然喺28分钟角球走甩对手，被马卡奥头槌顶入。不过巴塞好快还以颜色，柏迪35分钟禁区内接应传送，乱军中冷静连施2次假脚，将2名加拉塔沙雷守呃到瞓低，之後再施施然射入，成熟处理完全唔似一个19岁细路。

巴塞追平後继续进攻，奥巴美扬曾经头槌顶中楣，而呢位加蓬射手49分钟接应法兰基迪庄传送门前射入，呢球系佢近7场比赛第7个入球，最终巴塞赢2比1晋级8强。巴塞依家连续11场比赛不败，系球队自2019年5月以来最长嘅不败走势。

柏迪今场技惊四座，教练沙维赛後大赞：「我要再睇一次柏迪嘅过人，呢个入波非常神奇，佢只得19岁，能够教佢系我嘅光荣。」对於入波被拎去同美斯相比，柏迪就话：「我考虑射门，但见到好多只脚挡住，所以我继续扭，直到搵到机会，美斯入过好多好多波，同佢相比系件疯狂嘅事。」