曼联近期成绩低迷，唔少球员都被国家队「嫌弃」，继拉舒福特、查顿辛祖被英格兰弃用後，被公认为曼联今季表现最好球员嘅迪基亚，亦落选最新一期西班牙国家队名单，而且仲输畀同样嚟自英超嘅2个门将，世盃前景岌岌可危。

西班牙月底友赛阿尔巴尼亚同冰岛，领队安历基点兵并冇太大惊喜，不过门将迪基亚就意外落选，3名门将除咗惯常正选乌尼西蒙之外，仲有白礼顿门将罗拔山齐士同埋宾福特门将大卫拉耶，其中大卫拉耶更加系首次入选，佢之前从未代表过西班牙任何级别国家队，今场砌低迪基亚入选真系吐气扬眉。

迪基亚今季不断用神救嚟拯救曼联，个人表现绝对唔失礼，不过佢喺西班牙嘅地位就不断下降，对上一次为西班牙把关已经系上年10月嘅欧国联，如果情况持续落去，年底嘅世界盃决赛周都未必踢到。