曼城今季向住「3冠王」目标进发，而佢哋今季嘅成败，将会喺下个月嘅11日「地狱之旅」决定。由4月6月至16日间，曼城将会喺英超、欧联同英足盃4战利物浦同马德里体育会，如果呢段时间有乜冬瓜豆腐，今季努力随时毁於一旦。

曼城晋级英足盃4强後，抽中对冠军大敌利物浦，制造出11日4战地狱赛程。曼城4月6日先喺欧联8强首回合主场对马德里体育，10日就喺英超冠军前哨战迎击利物浦，14日欧联次回合作客马德里，2日之後英足盃温布莱再战「红军」，11日内同双雄4次对决系极大挑战。

幸运嘅系曼城目前人脚齐整，唯一伤兵鲁宾戴亚斯亦有机会赶及喺「地狱之旅」复出，领队哥迪奥拿亦指「3冠王」目标系有可能达成：「如果系9月、10月问我，我会话好困难，但球季只剩2个月而我哋仲竞争紧，咁就系有可能。曼联曾经做到过(3冠王)，证明呢件事系可以实现，其他球队一样有机会做到。」

文章关键字：利物浦曼城曼联英超