因为受到英国政府制裁，车路士班主阿布拉莫域已宣布将球会出售，不过呢位俄罗斯富商对足球热情不减，据报佢依家正洽购土耳其球会哥兹塔比，会谈已经全部展开，呢支土超球队入面更有一个前车路士球员，或者有机会再同阿布拉莫域重逢。

据土耳其媒体《Fanatik》报道，阿布拉莫域睇中土耳其老牌球会哥兹塔比，佢同球会现任班主施比尔已经展开洽谈，施比尔早前已宣布因为球队近期成绩差劲，今季结束後将会离开，阿布拉莫域就有意接手，消息指双方未来几日会再度开会。

哥兹塔比有差唔多100年历史，喺1950年曾拎过球会史上唯一一次顶级联赛冠军，不过今季就排联赛尾3，好大机会降班收场。哥兹塔比依家阵中最出名球员，系32岁阿根廷前锋迪山度，佢喺08/09球季登陆欧洲嘅第1站就系车路士。

文章关键字：罗斯