保罗普巴对曼联作出终极控诉！即将回复自由身嘅保罗普巴，近日返法国国家队备战期间，接受《费加罗报》专访发表惊人言论，直指过去6年曼联生涯系浪费光阴，甚至乎患上抑郁症。访问被英国媒体视为公开嘅「辞职信」，据报英超已有2间球会同佢进行斟介，保罗普巴下一站可能系纽卡素或阿士东维拉。

29岁嘅保罗普巴同曼联合约季尾完结，虽然「红魔鬼」想同呢位6年前用8,900万镑收购嘅中场续约，但佢近日接受《费加罗报》访问就表明立场：「对上5个球季完全唔能够令我满足，一啲都冇，今季一样已经死亡，我哋唔会赢到任何锦标。无论系踢曼联定其他球队，我都希望以冠军为目标。」

保罗普巴之後再批评曼联对佢嘅安排：「喺国家队好简单，我踢自己擅长嘅位置，知道自己嘅角色，对领队同队友都充满信心；喺曼联我有冇自己嘅位置？我问自己呢个问题，但系搵唔到答案。当你经常转换位置、球队转换体系、转换你嘅拍档，咁样好难会有稳定表现。」

访问最後保罗普巴更自爆患上抑郁：「(抑郁)系由同摩连奴合作开始，我嘅人生从来冇呢种经历，会不断质疑自己系咪做错，因为我赚到钱就应该开心？足球唔系咁样，讲到底我唔系超级英雄，只系一个普通人类。」保罗普巴呢段访问引起极大回响，英国《每日邮报》形容佢系向曼联公开「辞职」。

英国《天空体育》等多间媒体报道，除巴黎圣日耳门、祖云达斯之外，已有2间英超球会向保罗普巴进行斟介，《太阳报》更踢爆2间球会身份就系纽卡素同阿士东维拉；消息指保罗普巴周薪高达29万镑，今季只有曼城同车路士嘅薪酬上限能够负担，不过纽卡素获沙特阿拉伯财团入主後，同样可以轻易负担得到。

文章关键字：太阳曼城曼联英超