西班牙周日(27日)凌晨主场同阿尔巴尼亚踢热身赛，凭丹尼尔奥莫最後1分钟入波绝杀赢2比1。西班牙今场有门将大衞拉耶处子上阵，呢位踢走迪基亚嘅球员全场冇乜嘢做，但就同柏奥托利斯合演骑呢失波，要保住国家队位置仲要努力。

西班牙今次点兵，迪基亚意外落选，效力宾福特嘅26岁门将大衞拉耶，职业生涯只有15场顶级联赛经验，但就获得垂青兼喺今仗正选上阵。

西班牙主场控制战局，控球率高达76%，75分钟凭费伦托利斯入波领先，但去到85分钟，阿尔巴尼亚全场唯一中目标攻门就入波，当时柏奥托利斯头槌解围，省落对方前锋头部弹向龙门，大衞拉耶又冲咗出嚟想接，结果眼白白睇住个波碌入！好在西班牙仲有时间反击，丹尼尔奥莫喺90分钟绝杀，协助西班牙险胜2比1。

大衞拉耶赛後表示：「个失波只系一次意外，柏奥托利斯想用头槌回传畀我，但就省中对手......今日系我人生中最重要嘅日子，亦令我同我屋企人梦想成真，我会争取继续留喺国家队，用表现证明西班牙有我嘅位置。」