C朗球员生涯曾经夺得欧国盃、欧联、英超、西甲、意甲等大赛冠军，但佢之前4届为葡萄牙出战世界盃决赛周，都功败垂成，未能完成球王最後加冕，相比起2位经典球王比利、马纳当拿，C朗始终有些少缺失。

C朗首次为葡萄牙出战世界盃决赛周系2006年，当年仲有老大哥费高助阵，葡萄牙喺巴西名帅史高拉利率领之下，分组赛3战全胜，喺16强及8强分别淘汰荷兰同英格兰，可惜4强不敌法国，季军战输畀东道主德国，但已经系葡萄牙自1966年之後最佳成绩。

至於过去3届世界盃C朗独担大旗，葡萄牙成绩不进反退，2010年16强不敌西班牙，2014年更加分组赛出局，上届16强输畀乌拉圭，似乎C朗同世界盃冠军宝座嘅距离愈来愈遥远。

不过，要留意C朗由2006至14年3届世界盃合共只入3球，但上届轰入4球，加上上年欧国盃入5球，佢踢国际大赛，愈老愈犀利。

同埋葡萄牙过往被指系C朗一人球队，所以难有作为，但葡军近年人才辈出，锋线上有唔少後起之秀，包括利物浦前锋迪亚高祖达、马体会「新C朗」祖奥菲历斯，中场有曼联球星般奴费南迪斯，後防有曼城中坚鲁宾戴亚斯，前中後三线阵容强大，有力同各大劲旅周旋，依家就睇下葡萄牙能否重演2016年奇迹捧欧国盃冠军嘅好戏，帮C朗完成最後心愿。

文章关键字：意甲西甲利物浦曼城曼联英超