据意大利《罗马体育报》爆料，意大利缘尽2022年世界盃决赛周後，将会进入新时代，周三(30日)友赛土耳其前有大批主力退队，其中恩莫比尼、恩斯治尼同佐真奴更被传「精神崩溃」，已决定结束国际赛生涯，唔会再为意大利国家队披甲。

哀兵意大利作客土耳其前，6名球员获准提前离队，包括马高华拉堤、基安卢卡文仙尼、杜文尼高贝拉迪、恩莫比尼、恩斯治尼同佐真奴，当中又以後3者嘅退队最受关注。恩莫比尼、恩斯治尼同佐真奴系意大利出局後受到最大批评嘅3人，报道形容佢哋今次退队系因为「精神崩溃」，而且3人都已经年过30岁，考虑到意大利下一次有机会参加大赛已经系2年之後，消息指佢哋将会宣布退出国家队。

32岁嘅恩莫比尼喺意甲入球率极高，但踢国家队就表现低迷，长期受到球迷批评；30岁嘅恩斯治尼系上年欧国盃夺冠嘅进攻灵魂，但佢已签约今夏转战较低水平嘅美职，留喺国家队机会大减；同样30岁嘅佐真奴就最令人意外，佢喺车路士仍然踢出高水平表现，不过世盃外分组赛2次射失12码成为出局关键，惨成意大利球迷最大「箭靶」。

意大利《共和报》报道，对土耳其嘅热身赛会有多个新尝试，为意大利改朝换代做准备，前线三叉戟将由施卡马卡、拉斯柏杜尼同尼高路辛尼奥路出任，3位前锋都系22岁至23岁新星，佢哋被视为意大利重建嘅「未来」。

文章关键字：意甲