基斯甸艾历臣周三（30日）以队长身份替丹麦正选上阵对塞尔维亚，57分钟更攻入其复出後第2个入球，替球队3比0大胜。值得一提，今场波就喺去年艾历臣出事嘅帕肯球场踢，今场佢以完美姿态回归，全场球迷都为佢报以掌声。

今场丹麦对塞尔维亚嘅国际友谊赛，喺哥本哈根嘅帕肯球场举行，就系去年欧国盃艾历臣出事个球场。今次重临旧地，呢位30岁宾福特球员戴起队长臂章以正选姿态登场，整个球场内亦遍布写有「欢迎回来，艾历臣」等字句嘅支持横额。

战至53分钟丹麦已取得两球领先优势，4分钟後艾历臣禁区外远射得手，将比数改写成3比0，兼取得其国际赛第38个入球。比赛末段，当艾历臣退下火线时获全场球迷报以掌声，赛後更当选最佳球员。

佢赛後接受访问嗰阵亦坦言百感交集：「返到嚟帕肯球场而且取得入球，加上今场喺度接受到嘅欢迎，都令我感到毛管戙，我非常高兴！」