法国前锋拿卡锡迪同阿仙奴嘅合约今夏即将到期，去留成疑，令欧洲唔少球队都虎视眈眈，希望引入呢位30岁射手，为免呢位球队队长以自由身离队，兵工厂近期正考虑同佢续多1年约。

自奥巴美扬被雪藏，其後转投西甲劲旅巴塞隆拿，拿卡锡迪就一路稳坐兵工厂正印前锋位置，仲接过队长臂章。呢位法国前锋同阿仙奴嘅合约，将会喺今年夏天到期，佢会否继续留效成为关注。兵工厂当然唔希望佢以自由身身分离开，据法国传媒报导，球会将会同拿卡锡迪续多12个月约，另加其後再续约1年嘅条款，企图挽留呢位球队队长。

现时除咗巴塞隆拿之外，拿卡锡迪嘅前东家里昂，都有意罗致呢位射手，不过兵工厂领队阿迪达，就向传媒表示拿卡锡迪嘅续约问题，会等到季尾先至有定案。作为兵工厂9号波衫主人，拿卡锡迪今季联赛上阵23场，只系攻入4球，入球效率麻麻，不过近期国际赛期冇份入选法国国家队嘅拿卡锡迪，早前喺对宾福特B队嘅友赛中为阿仙奴披甲上阵，仲大演帽子戏法，唔知今个周末联赛重开後，佢可否将好脚风带落英超赛场呢？