加里夫巴利今夏同皇家马德里约满後，将会回复自由身，早前世盃外附加赛嘅精彩表现，证明「大圣爷」仲系宝刀未老！加里夫巴利曾表示退休前乐意去美职效力，而佢嘅前威尔斯队友哥利臣透露，正为加里夫巴利搭路过美职，目的地可能系哥利臣依家任教嘅阿特兰大联。

阿特兰大联上年任命前威尔斯国脚哥利臣做预备组教练，呢位33岁前韦斯咸球员表示：「加里夫巴利如果嚟阿特兰大联，肯定会受球迷热烈爱戴，佢有神奇嘅足球生涯，我肯定佢仲想继续比赛，嚟美国踢波会系天作之合，大家都睇到美职愈嚟愈有竞争性，亦吸引到好多球星加盟，加里夫巴利会系多间美职球会猎物，最好就梗系加盟阿特兰大联啦！」

美职新一季有唔少名牌球星登陆，意大利国脚恩斯治尼会喺今夏由拿玻里转投FC多伦多、前巴西国脚杜格拉斯哥斯达就加盟洛杉矶银河、瑞士国脚梳顿沙基利转投芝加哥火焰，星光系近年最劲嘅一季，如果加里夫巴利都去埋，美职将会更受注目。