曼联今季成绩欠佳，惹来一班「红魔」拥趸非常不满。周日（3日）赛和李斯特城1比1嘅赛事入面，一位季票持有者向後备席大闹曼联球员冇斗心，但就被技术总监费查以一句「你系边X个！」还击，引起公众譁然。

曼联今季成绩未见起色，目前仅得51分排第7，仲要为前四嘅位置而挣扎，周日（3日）主场斗李斯特城更被对手逼和1比1，惹来球迷恨批。而喺呢场波入面，一位25岁曼联季票持有者Jamie Caplan更加喺失波之後向爱队後备席大闹：「你哋似战斗紧咩？你哋根本唔在乎！」

Jamie Caplan事後向《曼彻斯特晚报》透露，当时曼联技术总监费查竟然向佢还击：「佢系唯一一个拧转面向我反击，叫我坐低同问我系边X个！」Jamie强调自己嗰句说话冇针对费查，只系对球队爱之深责之切，却被费查咁样用粗口问候，佢为此感非常愤怒：「我真系好嬲，作为一个季票持有者，我为曼联付出过咁多钱。佢似乎唔太锺意我讲嘅说话，但佢唔能够否认，因为佢深知球队表现唔合乎球迷期望。」

《曼彻斯特晚报》补充，曼联知悉事件後意图补镬，打算同Jamie同其他季票持有者坐埋一齐倾，尝试解决件事。