因班主阿布拉莫域与俄罗斯关系密切，而遭英国政府制裁的英超球队车路士，卖盘进度继续备受关注，作为潜在买家之一的美国富商Todd Boehly，近日就被发现嚟到史丹福桥球场观战，贴地作风获车迷好评。而在卖盘尚未完成的情况下，车仔运作继续受影响，据报球员甚至要夹钱为球队大巴出油费。

早前车仔卖盘嘅消息一出，就吸引全球唔少投资者出手，其中由Todd Boehly和瑞士富商韦斯组成财团，亦系接手呢间伦敦球会嘅热门人选之一。近日呢位美国富商，就被发现以一身低调打扮现身伦敦，去到史丹福桥球场睇波，见证车路士喺欧联8强首回合，以1比3输畀皇家马德里。有车仔球迷就喺网上留言，大赞身为富豪嘅Todd Boehly，愿意亲身去球场睇波认真贴地，认为佢系车仔新班主嘅合适人选。

作为美职棒洛杉矶道奇班主之一的Todd Boehly，对投资体育产业并不陌生，现时除咗以佢为首的财团之外，美国商人Ricketts家族财团，以及由前利物浦主席Martin Broughton率领嘅财团，都有意争夺车仔拥有权。

不过卖盘结果一日未确定，受制裁影响嘅车仔，仍然只可以有限度运作，除咗军医同物理治疗师等与一队相关人士之外，球会嘅营业、人力资源及会计等其他部门，都已经停止运作。据西班牙媒体报导，虽然车仔职员仍然如常有粮出，但喺球会户口被冻结嘅情况下，车路士已经无办法应付其他开支，球员甚至要自己揞荷包，帮球会大巴出油费。

文章关键字：罗斯利物浦英超