近年发展麻麻嘅云迪碧克，加盟曼联後一直坐多过踢，季中以借用身份转投爱华顿，但又因为大腿受伤需要休养。不过依名「黑仔王」近日场外就传出喜讯，正式荣升做老窦，踏入人生新一页。

云迪碧克早前喺社交平台，发布咗两张囡囡出世嘅相，并写道：「欢迎来到世界Lomee van de Beek - 09/04/2022，Estelle为你感到骄傲。」云迪碧克老婆Estelle系荷兰传奇柏金个女，双方自2019年开始拍拖，一直相当甜蜜，洛米亦属於佢哋第一个小朋友。

24岁嘅云迪碧克上季由荷甲劲旅阿积士加盟曼联，不过上阵机会唔多，大部分更只系担任後备，为红魔鬼只系射入2球同交出2次助攻。1月份借用至爱华顿，随即受到领队林柏特重用，不过训练期间意外拉伤大腿，暂时只为球队上阵6场。云迪碧克同曼联合约去到2025年夏天，有传红魔鬼无意将佢买走，依名荷兰国脚下季好大机会归队。