周六（16日）曼联3比2赢诺域治嘅赛事入面，法国球星保罗普巴换出嘅时候遭到主场球迷报以嘘声，更被粗口辱骂，佢赛後离场时以手摆耳仔嘅动作回应负评。兰历克赛後亦力撑普巴，认为佢唔应该受到咁嘅对待。

「红魔」周六（16日）喺奥脱福凭C朗大演帽子戏法，3比2击败位处榜尾嘅诺域治，终止3场不胜颓势，不过对保罗普巴而言，今场波绝对唔系佢愉快嘅时候。下半场一次角球攻势入面，普巴先被队友哈利马古尼「Team Kill」踢爆缸，当时佢已经非常气愤，仲要喺被拉舒福特入替嘅时候，遭到主场球迷报以嘘声。

呢位29岁法国国脚赛後步入球员通道嘅时候，有球迷更以粗口歌「X你普巴」侮辱佢，普巴就做出单手摆耳仔，象徵「你即本唱罗」意思嘅动作回应负评。赛後记招中看守领队兰历克亦力撑普巴，呼吁曼迷唔好追击佢：「我完全理解班球迷点解会对球队失望，但我认为针对个别球员系毫无道理。」

今夏普巴将与曼联完约，好大机会自由身离队，而曼联今季成绩欠佳，难免球迷间唔时会搵个别球员做出气袋，但兰历克就话：「呢个系大家嘅责任，所以我经常保护我班球员，我睇唔到佢今场有做错嘅地方。」

文章关键字：曼联