阿仙奴前锋拿卡锡迪日前公开证实，佢正同多间球会就夏季转会进行斟介，意味离开效力5年嘅阿仙奴几成家局。呢位30岁前锋表示对母会里昂感情深厚，暗示如果里昂抢到来季欧联席位，好大机会再续前缘。

拿卡锡迪同阿仙奴嘅合约去到季尾完结，不过续约迟迟未有进展，拿卡锡迪已经可以用任何英格兰以外球会斟介，佢近日接受法国媒体《Canal+》访问表示：「我同好多间球会都倾紧，对转会持开放态度。我同里昂嘅联系从未间断，每年都会返去1、2次探我嘅队医朋友，里昂知道我就快回复自由身，佢哋可以提出斟介，我想踢欧联，我已经好耐冇踢过欧联，好挂住呢个比赛。」

自从奥巴美扬因纪律问题被雪藏兼1月离队後，拿卡锡迪就成为阿仙奴正选前锋，不过佢今季联赛只有4个入球，其中2球仲系嚟自12码，已经超过4个月未喺运动战入波，表现受到唔少批评。拿卡锡迪上场因确诊新冠肺炎而缺阵，未知几时可以复出。