曼联落实下季由坦哈格执教，兰历克就会转做球会顾问，不过有传佢同曼联总监费查「唔妥」，除咗唔想费查过分干预比赛事务外，更嫌呢位前苏格兰国脚「太多口水」，兰历克已经要求佢唔好畀球员太多指令，乖乖哋坐喺场边睇波，似乎两人嘅关系唔太融洽。

费查系由前领队苏斯克查搵返嚟做教练，之後更「升职」做埋曼联史上首个总监，兰历克上任後，佢亦一直兼顾总监同教练位置，但呢2个身份就有啲尴尬，一方面辅助兰历克领军，另一方面就力斟坦哈格嚟取代兰历克，令两人嘅关系变得突兀。

英国《每日电讯报》报道，费查喺比赛期间经常大叫向球员落指令，加上早前曾经同现场球迷闹交，令兰历克有所微言，已要求费查唔好「太多口水」。事实上，费查作为教练团之一，参与球备战亦系正常，消息指每次有球员受伤缺练，费查直情会落场加入分队练习，影响力都几大。