利物浦球星穆罕默德沙拿今季表现继续强势，目前正协助利物浦向住4冠王嘅目标迈进。佢日前受访时表示，希望凭住帮球队赢联赛同欧联冠军以夺得2022年度金球奖，成为首位赢得呢项殊荣嘅阿拉伯球员；又豪言认为自己系地球上最强嘅球员，但绝对尊重其他对手。

沙拿今季为「红军」各项赛事上阵42场攻入30球，2月先赢得英联盃冠军，依家更有机会冲击4冠王。佢日前接受英国媒体《442》访问时表示，希望可以喺今季擸晒所有冠军，以造就自己竞逐今个年度嘅金球奖，并藉此作为送畀阿拉伯国家人民嘅礼物：「我其中一个人生目标系改变人民，尤其是我祖国同阿拉伯国家，令佢哋觉得其实自己都可以追梦。」

佢仲话对自身充满信心，喺尊重别人嘅前题下一直深信自己系地球上最强嘅足球员：「当然我唔会话自己劲过呢位劲过嗰位，但喺我心目中自己就系最好。」

文章关键字：利物浦