曼联输畀排第4嘅阿仙奴後，落後对方6分，即使余下4场全胜都好难重返前4出席来季欧联，看守领队兰历克坦言，如果曼联最终得第8名，来季彻底「脱欧」，反而有利重建，佢嘅讲法唔系冇道理。

兰历克认为，如果下个球季唔使应付欧洲赛，对曼联好处更多：「无缘欧洲赛可能系一种优势，不过并唔代表我哋最後4场hea踢，我同曼联仍会每场全力争胜，再睇最後排第几，不过依家再谈论来季欧联资格，已经冇意义。」

呢位「逼抢之父」嘅讲法唔系冇道理，例如今季阿仙奴就冇欧洲赛负担，可以专注联赛同球队重建，所以依家再度冲上前4，就连高普执教嘅利物浦，初期都曾经排第8，唔使应付欧洲赛，为日後冲冠打下良好根基。

兰历克更明言，今季之後，会有大批球员离队，但同时亦会签入大批新兵：「新主帅上任後，将会为球队注入新能量，不少球员合约到期，亦会有新兵加入，配合新领队，我好肯定下季嘅曼联会变得更好。」

文章关键字：利物浦曼联