俄乌战事爆发後，俄罗斯富豪阿布拉莫域随即畀英国政府制裁，令依名车路士班主需要急住卖盘。据当地媒体报道，如果「油王」唔能够喺今个月之前成功出售「蓝战士」，球队将会被勒令退出英超，面临解散风险！

根据《每日电讯报》最新消息，英国政府宣布唔会延长车路士特许经营牌照，意味住如果阿布拉莫域唔能够喺5月31号之前卖走车路士，依支拥有117年历史嘅老牌球队，将会被逐出英超。

事实上由3月开始都有唔少买家，希望入主车路士，好似英国最有钱嘅Jim Ratcliffe、美国81岁富商Stephen Ross等等，不过由於「油王」要求嘅条件比较苛刻，包括10年内都唔可以卖走球队套现赚钱，仲要每年需要投入一定资金，去维持豪门地位，最终令收购迟迟未能成事。

俄罗斯足球近期受到毁灭性打击，男子足球代表队先失去今年世盃欧洲区附加赛资格，随後又畀欧洲足协除名，无得参加22/23赛季欧国联比赛；另外辛尼特、莫斯科中央陆军、莫斯科斯巴达等球队，亦被罚禁止参加下季欧联、欧霸等赛事。

文章关键字：罗斯足协英超