曼城冠军在望！周一(9日)凌晨英超大战，啱啱喺欧联4强出局嘅曼城一扫颓风，主场以5比0狂数纽卡素，唔单止以3分领先次席利物浦，就连得失球差亦成功逆转，「蓝月亮」只要喺最後3轮联赛拎多7分，就可以成功卫冕。

趁住利物浦今轮失分，曼城球员今仗决心十足，史达宁19分钟近门头槌先开纪录，中坚拿朴迪喺38分钟门前执鸡射成2比0。换边後曼城继续猛攻，洛迪卡斯简迪61分钟接应角球顶入，完场前菲尔科顿同史达宁分别入球，协助曼城大胜5比0。

赛前曼城嘅得失球差落後利物浦1球，但今场大胜令形势逆转，曼城目前得失球系+68，抛开利物浦嘅+64，如果两队最後同分要靠得失球决胜嘅话，曼城呢场大胜可能系关键。不过，曼城最後3轮只要拎到7分，就肯定可以夺冠，对手分别系狼队(客)、韦斯咸(客)同阿士东维拉(主)。

曼城领队哥迪奥拿赛後表示：「依家情况系，我哋(封王)需要9分或者6分，视乎之後得失球情况，我哋有可能会输1场，所以得失球系非常重要，周中(12日)对狼队系真正嘅决赛，命运掌握喺我哋自己手中。」

文章关键字：利物浦曼城英超