祖云达斯於意大利盃决赛失利後，阵中後防老将基亚连尼随即宣布将会喺季尾离队，结束17年祖记生涯，据报呢位意大利中坚已经收到美职球会嘅邀请，好大机会喺美国继续职业生涯。

祖记於意盃决赛以2比4不敌国际米兰，与冠军失之交臂，亦系继2010/11赛季後，球队首次全季冇冠军落袋，是役戴上队长臂章出战嘅基亚连尼，赛後亦向传媒讲到自己去意已决：「我会让路畀年轻球员，下年我唔会再喺球队。下周一我会同主场馆告别，嚟紧对费伦天拿亦会系我嘅最後一场比赛。我同球队一起经历10年光辉岁月，依家要靠其他人延续落去，呢个决定系百分百由我做出，咁多年嚟我竭尽所能，嚟紧我会成为祖记嘅一大球迷。」

现年37岁嘅基亚连尼，2004年由利禾奴加盟祖记，过去曾帮助呢支意甲豪门连续9次喺联赛封王，以及5次捧起意盃冠军，佢亦系祖记队史上阵次数第3多嘅球员，仅次於迪比亚路同保方，见证球队一段辉煌时期。据报美职球队FC洛杉矶有兴趣罗致呢位祖记功勳球员。

文章关键字：米兰意甲