曼城同利物浦嘅英超争霸，要喺煞科战定生死，当所有球迷都买定花生，等睇「红军」传奇谢拉特点样带领阿士东维拉阻止曼城，有消息指原来曼城如果顺利夺冠，维拉将可以透过基亚利殊嘅合约条款，得到1,500万镑奖金！谢拉特会要感情定要奖金？

曼城依家领先利物浦1分，煞科战只要主场赢维拉就可以卫冕，维拉领队谢拉特嘅「红色背景」，令人相信佢会尽力阻止曼城夺冠，但前曼城球星米卡李察士喺《Talksport》节目爆出惊人消息：「谢拉特会想帮助利物浦捧盃，不过维拉喺卖走基亚利殊嘅合约中有个条款，只要曼城夺冠就会启动，奖金系1,500万镑，而足球呢门生意一向系金钱第一。」

维拉喺去年夏天以1亿镑转会费卖基亚利殊去曼城，当中包含多项浮动条款，需要附合条件先至会启动，赢英超冠军就系其中之一，呢种做法喺现今球坛系常见做法，所以唔会违反英超条例。