南韩球星孙兴民喺今季英超，最终以23个入球夺得神射手，成为首位荣膺呢项殊荣嘅亚洲球员，佢嘅威水成就甚至连南韩总统尹锡悦，亦都发文道贺享受「同国光荣」，更称呼孙兴民系全南韩年轻人嘅榜样。

29岁南韩国脚孙兴民，今季以不涉及12码嘅23个入球，与利物浦前锋穆罕默德沙拿并列射手榜第1位，一同夺得英超金靴奖，成为首位获得呢项殊荣嘅亚洲球员。就连刚履新南韩总统嘅尹锡悦亦都专登发文祝贺孙兴民：「衷心祝贺你获得本赛季英超最佳射手，这是你为球队孜孜不倦工作的结果。」佢仲话，「老孙」嘅成就不但增添个人荣誉，更加系全南韩年轻人嘅模范：「再次祝贺孙兴民，为南韩的年轻人们树立了世界顶级运动员的榜样，我们国民将支持你今後继续努力。」

除咗新总统之外，好多非体育界嘅名人亦都享受孙兴民嘅「同国光荣」，包括男团组合防弹少年团成员郑号锡，喺社交媒体分享孙兴民获奖嘅时刻；而男影星尹灿荣嘅社交网站个人头像亦都换上「老孙」嘅肖像，以示对佢嘅祝贺。