正喺新加坡集训嘅利物浦，周五(15日)晚热身赛以2比0击败水晶宫，拎到季前第1场胜仗，不过「红军」目前受到伤兵潮困扰，继门将艾利臣比加喺练习受伤後，阿历士张伯伦喺比赛中亦负伤离场，不过最令人担心系葡萄牙前锋迪亚高祖达，据报佢大腿旧患复发，领队高普证实佢将会错过开季赛事。

利物浦上仗喺泰国吞曼联4蛋，今仗面对残阵嘅水晶宫表现回勇，12分钟就由佐敦轩达臣射入先开纪录；下半场利物浦换入啱啱续约嘅穆罕默德沙拿同新兵达云纽尼斯等主力，沙拿落场1分几钟就建功，「红军」之後控制战局，但未能增添入波，最终赢2比0完场。

利物浦今场再添伤兵，阿历士张伯伦完半场前大腿受伤坐地上，即时示意需要换人，高普赛後表示：「情况令人失望，佢训练表现好好，之前都试过咁嘅情况，今次系肌肉问题，唔算最坏情况，我唔知会缺阵几耐，但肯定佢会返嚟帮助球队。」张伯伦嘅受伤令球迷担心球队中场兵源，尤其利物浦表明今夏唔会再买人。

「红军」未开季已有多位伤兵，祖高美斯缺阵被指系预防性质，门将艾利臣比加亦喺练习受伤，但最令人担心系前锋迪亚高祖达，佢上月代表葡萄牙踢欧国联嗰阵大腿受伤，近日检查发现旧患复发，高普表示：「艾利臣唔会抖好耐，但缺练每一日都系好大损失；祖达嘅伤患同之前系同一个位置，情况唔多好。」

利物浦未来2场热身赛对RB莱比锡同萨尔斯堡，7月31日就会对曼城争夺社区盾，展开新球季赛事，高普透露：「艾利臣有机会赶得切对曼城，但祖达就肯定唔得，佢嘅伤唔系好严重，但球季非常漫长，我哋得特别谨慎处理。」

文章关键字：利物浦曼城曼联