美职再有球星加盟！FC多伦多周六(16日)官方宣布，意大利国脚贝拿迪斯治正式加盟，双方签约至2026年，成为FC多伦多阵中第3个意大利球星，贝拿迪斯治同恩斯治尼合组嘅进攻线，令球迷非常期待。

28岁嘅贝拿迪斯治过去5季都效力祖云达斯，今夏约满後未获续约，消息指佢喺美职年薪达500万欧元。FC多伦多会长曼宁表示：「我哋好开心签到贝拿迪斯治，作为球员同埋一个人，佢都系球队更衣室最合适人选，佢喺祖云达斯同意大利国家队已证明自己系个冠军级球星。」

踢翼锋嘅贝拿迪斯治喺多伦多都有好多老友，球队早前已签入前锋恩斯治尼同後衞基斯薛图2位意大利球员。FC多伦多目前排东岸尾2，不过随住恩斯治尼同贝拿迪斯治即将亮相，球队成绩可望大幅提升。