曼联聘请荷兰名帅坦哈格执教後，喺季前热身赛表现出色，唔少球员都有脱胎换骨表现，原本已经被放弃嘅法国前锋安东尼马迪尔，喺C朗拿度缺阵下担大旗光芒四射，连续3场入波创近15年纪录。据报坦哈格非常满意安东尼马迪尔表现，决定改变计划留用呢位射手，放弃高价收购前锋嘅计划。

26岁嘅安东尼马迪尔效力曼联7年，但上季喺苏斯克查同兰历克执教下惨被放弃，今年1月外借西维尔亦冇起色，9场联赛0入球，正当全世界都以为佢会被曼联卖走，安东尼马迪尔喺坦哈格改造後全面翻生。喺对利物浦、墨尔本胜利同周二(19日)对水晶宫3仗，安东尼马迪尔都有入波，令佢成为07年朗尼同C朗後，首个连续3场季前热身赛入波球球员，如果澳洲之旅尾站对维拉再入波，就可以追平朗尼连续4场入波终极纪录。

据《talkSport》报道，曼联管理层认为安东尼马迪尔翻生，将会解决球队锋线问题，报道指坦哈格原本希望增添1名攻击球员，目标锁定阿积士嘅安东尼马菲奥斯，但阿积士索价7,000万镑令交易停滞。消息指曼联认为安东尼马迪尔值得再有机会，曼联名宿笠臣亦向《MUTV》表示：「安东尼马迪尔上季失晒信心，表现唔可以作准，佢前季表现都好出色，佢同C朗会系好好嘅前锋选择，安东尼马迪尔好清楚坦哈格嘅指示。」

坦哈格对安东尼马迪尔近期喺前场嘅工作亦表示肯定：「我要求球员喺前场开始逼抢，你见到佢哋付出好多能量去防守，而且亦得到入波作为回报，因为球队可以喺前场逼甩对方制造机会。」喺C朗去留未明情况下，安东尼马迪尔开季好大机会成为曼联正选前锋。

文章关键字：安东尼利物浦曼联