利物浦结束亚洲之旅返回欧洲，嚟紧周四将会到访RB莱比锡踢热身赛，今场除咗练兵，仲可能会增兵添，因为「红军」睇中对方匈牙利国脚中场苏保斯拉尔，到时可以近距离观察对方表现，合心意嘅话仲可以即场斟介。

利物浦同「红牛系」球队关系密切，季前热身赛都搵佢哋，今场对完RB莱比锡，下场会对萨尔斯堡，对方有啱用球员，利物浦都会第一时间收到风，今次佢哋睇中嘅苏保斯拉尔，现年21岁，系匈牙利新星。

苏保斯拉尔喺奥地利球坛出道，曾效力萨尔斯堡4个球季，2020年转投RB莱比锡至今，当时转会费2000万欧元成为匈牙利最高身价球员，不过加盟首个球季经历伤病未有上阵，更因此错过去年欧国盃决赛周，上季复出上阵45场入10球，上月欧国联匈牙利双杀英格兰，其中一场就系由佢一箭定江山赢1比0。

由於表现出色，苏保斯拉尔吸引多间欧洲豪门关注，利物浦第一时间吼实，其身价据报为2300万镑，如果成事，将会继拿比基达及伊巴希马干拿迪後，又一位莱比锡球员转投利物浦。

文章关键字：利物浦