曼联领队坦哈格上任後，拉舒福特获得无限信任，开季甚至压倒C朗拿度成为正选箭头，而呢位英格兰前锋亦用入球回报领队信任，对阿仙奴梅开二度後，今季已有3个入波进帐，而且重现「Big6杀手」本色，佢嘅正选前锋位置相信好稳阵。

拉舒福特上季英超只入4球，表现受到猛烈批评，不过今季6场联赛都正选披甲，今仗对阿仙奴交出2入波同1助攻，系佢自2020年12月後首次喺英超梅开二度。拉舒福特今季已有3个入球，除咗对阿仙奴入2粒，另一球就系上月2比1赢利物浦入波。

拉舒福特出道已有「Big6杀手」称号，佢嘅英超生涯合共入62球，当中23球系攻破利物浦(6球)、车路士(5球)、热刺(4球)、曼城(4球)同阿仙奴(4球)大门，认真犀利！